Nolosha Cusub
Ku soo dhowaada Nolosha Cusub! Qof kale u dir Boggan iimayl ugu dir saaxiib



ASBUUCA MUQADASKA AH 2014: IIDDA SARAKICIDDA

Maalinta Axadda, 20 April, malaayiin ah Masiixiyiinta ku nool dunida daafeheedu waxay u dabbaaldegayaan munaasabadda ugu farxadda badan taariikhda aadanaha: ka-sarakiciddii dhimashada ee Ciise Masiix. Sarakiciddani waxay si cad u muujisay guusha uu Masiixu ka gaadhay awoodaha Shayddaanka, denbiga iyo dhimashada. Waxay muujisay inuu Masiixu aadanaha ka xoreeyay inkaartii denbiga ee timid markii waalidiinteennii ugu horreeyay ee Aadan iyo Xaawa ay ku dhaceen denbiga.

Dhacdadan wax ku saabsan aynu ka akhrino Injiilka siduu u qoray rasuul Matayos:
 “1 Sabtidii dabadeed goortii waagii beryayay maalintii ugu horraysay ee toddobaadka, Maryantii reer Magdala iyo Maryantii kale waxay u yimaadeen inay xabaashii arkaan.
 2 Oo bal eeg, waxaa jiray dhulgariir weyn, waayo, malaa'igta Rabbiga ayaa intay samada ka soo degtay timid oo dhagixii ka giringirisay oo ku dul fadhiisatay.
 3 Midabkeedu wuxuu u ekaa hillaac, dharkeeduna wuxuu u caddaa sida baraf cad.
 4 Oo cabsi aawadeed kuwii ilaalinayay waa gariireen, oo waxay noqdeen sida meydad.
 5 Malaa'igtii ayaa u jawaabtay oo naagihii ku tidhi, Ha baqina, waayo, waxaan ogahay inaad doonaysaan Ciise, kan iskutallaabta lagu qodbay.
 6 Halkan ma joogo, waayo, wuu sara kacay siduu yidhi. Bal kaalaya oo arka meeshii Rabbigu jiifay.
 7 Dhaqso u taga, oo waxaad xertiisii ku tidhaahdaan, Kuwii dhintay ayuu ka soo sara kacay, oo wuu idin hor marayaa ilaa Galili. Halkaasna waad ku arki doontaan. Bal eega, waan idiin sheegaye.
 8 Dhaqsoba waxay xabaashii kala tageen baqdin iyo farxad weyn, oo waxay u ordeen inay xertiisa u warramaan.
 9 Kolkaasaa Ciise ka hor yimid oo ku yidhi, Nabad. Markaasay u dhowaadeen oo intay cagihiisa qabteen ayay caabudeen.
 10 Markaasaa Ciise wuxuu ku yidhi, Ha baqina. Taga oo walaalahay u sheega inay Galili tagaan, oo halkaasay igu arki doonaan.”

Sarakiciddii Ciise Masiix halka ay xertiisa farxadda uga keentay, cadaawayaashiisu (culummadii iyo wadaaddadii Yuhuudda) arrintaas iyada ah kumay farxin. Bal u fiirso waxa dhacay markay warka ka maqleen ilaaladii xabaasha:

 “11 Intay sii socdeen ayaa waardiyayaashii qaarkood magaaladii yimid, oo waxay wadaaddadii sare uga warrameen wixii dhacay oo dhan.
 12 Iyaguna goortay waayeelladii la shireen oo ay wada hadleen, ayay askartii lacag badan siiyeen,
 13 oo waxay ku yidhaahdeen, Waxaad tidhaahdaan, Xertiisii ayaa habeennimo timid oo xadday isaga intii aannu hurudnay.
 14 Oo haddii taliyihii waxan maqlo, waannu rumaysiinaynaa oo waannu idiin welwel tiraynaa.
 15 Markaasay lacagtii qaateen oo yeeleen sidii lagu yidhi. Hadalkanu maalintaas ilaa maanta waa ku dhex firdhisanaa Yuhuudda.”

Saaxiibbayaal, sarakicidda Ciise Masiix waxay kuwa isaga isku halleeya siinaysaa hubaalnimada inay dhaxli doonaan nolol waaraysa. Sarakicidda Ciise Masiix waxa diiday kuwo badan, laakiinse waxa weeye munaasibadda ugu farxadda iyo qalbiqaboojinta badan marka la eego taariikhda aadanaha.

Ma rabtaa inaad wax dheeraada oo ku saabsan mawduucan muhiimka ah maqasho? Halkan riix/guji:
Dooro barnaamij JC97 Ciise Masiix ka sara kiciyay kuwa dhintay
ama, riix/guji halkan:
oo dooro S04 Dhimashada & Sarakicidda Masiixa


Halkan guji/riix si aad heli kartid qormooyinkii hore ee taxanahan ku saabsan ballamadii Eebbe


"55 Dhimashoy, meeday libtaadii? Dhimashoy, meeday micidaadii?
56 Micida dhimashadu waa dembiga, oo xoogga dembiguna waa sharciga.
57 Laakiin Ilaah baa mahad leh kan libta inagu siiya Rabbigeenna Ciise Masiix.
58 Sidaa daraaddeed, walaalahaygii aan jeclahayow, noqda kuwa adag, oo aan dhaqaaqayn, oo had iyo goorba shuqulka Rabbiga si aad ah u sameeya, idinkoo og hawshiinnu inayan khasaare ahayn xagga Rabbiga."

Warqaddii 1aad ee rasuul Bawlos u qoray dadka Korintos 15